Sou Bernadeto Zunino e Enri Barthès.
Bernadeto Zunino fouguè publicado per Ive Gourgaud, ço qu'es la garantido la mai siguro de mistralisme leiau !
Publiquè la tièiro coumplèto dis articles de l'Armana prouvençau de 1855 à 2004.
Enri Barthès nous es mièl counegut. Fetivomen acò's el que publiquè en 1981 "Las Bezieirencos", un recuei de tèstes bezierencs en lengo d'o.
Ve soulomen de faire sieissanto ons. Acò vòu dire qu'avio pas trento ons quand publiquè "Las Bezieirencos". Acò empachè pas lou vièl oucitanisto Ives Roqueta de nous dire à l'epoco qu'acò èro un lhibre "publicat per un vièl enchiprous" !!!! Roqueta qu'o passat lous quatre vints ons despuèi quauques temps !
Enri Barthès es lou primier conse de Sant-Geniès de Fountarecho. Es maridat e paire de duoi drollos. Escrieu am' eleganço tô plô lou lengadouciô coumo lou prouvençau.
Li sèt primadiers del Felibrige
Es cabiscol de l'Escolo felibrenco Trencavèl, à la seguido de Fernand Birot, un aute poueto.
Ourganiso souvent d'eveniments en l'ounour de la lengo d'o, e notamen de soun oumounimo Jano Barthès, qu'escriguè lou manifique rouman "Lisou, Lengadò 1900" qu'es uno grondo obro. (Sou pas parents çaquedelai).
Es presintat per Marìo Nadàlio Dupuis, sendico de la mantenéncio de Lengadò del Felibrige. Se presinto à la cigalo de la Narbouneso, vèuso del majourau auvernhat Clemens Besoumbos.
Am' aquéssi dous valents lou Felibrige ganhario dous majouraus vertadiers, mistralencs. Acò fario lou countrapés de las tentativos di separatistos "occitans" per aganta lou Felibrige.
(Pensat que l'occitanisto anti-felibre, anti-mistralenc Jacme Taupiac avio aderat al Felibrige sounque per pausa sa candidaturo al majouralat !
Fouguè presintat antan per Jòrdi Passerat, l'oucitanisto qu'avio gausat prouclama al Counsistòri : "Lou Felibrige, m'en fouti, soui dintrat dedins per i faire avança las idèios occitanos" !!!
Mas, maugrat qu'èro lou soul candidat, lou disciple del gestapisto Louis Alibert fouguè deboutat. Lou Felibrige es inquèro viéu, chau crèire !
Aven souvent criticat duromen lou Capoulié à la Coumpanhio Mistralenco, mas guel, ou d'àutri de soun entour, ténou inquèro la barco. )
Deziran lou succès à noùsti dous champiouns del Mistralisme !
Arsèni Vermenouzo, que fouguè lou primier
majourau auvirnhat.
Julian Brabò, mièl counegut souto soun
noum d'escais de Jan Castanho, fouguè
lou primier majourau cevenòu.
Enri Barthès councluguè sa rapugado de pouèmos bezierencs per un pouèmo siéu en prouvençau que fazio referéncio à diversos obros del lhibre.
lou vaqui :
Pouèto, canterias lou trelus de l'Istòri ;
Vosto vouès melicouso e voste vers biaissu,
Dins Beziés aubourant lou bras de Pepesu,
An clanti jusqu'à vuèi, alargant si belòri.
Vejerias passeja lou Camèu caboussu,
Jaqueto avès prega, e Riquet faguè flòri.
Avau, de Sant-Andìu amaga dins sa bòri
Tasterias lou barral pèr gari voste eissu.
Avès begu lou fru dóu soucan generous
Qu'alando la fierta, amousso la rancuro,
Fin-qu'à nautre adusès lou remembre courous
Di vièi anequeli souto la lauso escuro.
E que voste estrambord sus lou sègle paurous
Fague mai restounti la vièio parladuro.
Enri Barthès,
lou 15 de Juliet de 1981
Se picat "voir le commentaire", veirés lou coumentàri d'Ive Gourgaud que nous ensenho qu'aven uno tresenco candidato mistralenco, Jano Blacas, de Brinholo. Ammé guelo lou Felibrige tournario à sa grondo tradiciou que voulio que li majouraus fouguèssou d'escrivans.
/fdata%2F4189852%2Favatar-blog-1203636952-tmpphp67xRFi.jpeg){kind=avatar}