Dimars 8 de mars 2011 lou 29 del mes Amshir de l'on 1727 pes coptes, avèn de nouvèlo en miejo-tencho soubre la situaciou en Egipto.
D'un coustat coumo avèn ja di, la semblo-revouluciou o delarga lou fanatisme islamique coumo uno ueiteno plago d'Egipto. Lous cristiôs patìssou mort e passiou de la part di musulmans e de las autouritas loucalos.
En eschàmbie, avèn l'impressiou d'uno evouluciou pousitivo dis autouritats las pus naltos.
Durant la liturgìo de nadau à la glèiso copto de Châtenay-Malabry
AL CAIRE, lou 5 de mars 2011 (AFP) - Egipto: de cristiôs manifèstou après de viouléncios countro eles.
Près de 2.000 cristiôs egipcians manifestavou dilun al Caire pel tresen jour de seguido après de viouléncios counfessiounalos : duoi persounos soun estados tuados e uno glèiso es estado cramado, ço-dìsou lous mejans ouficiaus egipcians.
Recampas davant lou sèti de la televisto publico, aqueles Coptes esìjou qu’on tourne basti la glèsio Al-Shahidain, à Soul, dinc lou gouvernourat de Helwan al sud del Caire. La glèiso es estado en grondo partido darouchado dissate per un incèndi, segoun l’agéncio ouficialo Mena e segoun la televisto d’estat.
Las viouléncios avioun agu coumo pretèste uno relaciou amourouso entre un cristiô e uno musulmano.
Uno garrouio se faguè entre lurs familhos, qu’aun mena divèndres à de batuèstos dinc lasqualos lou paire del cristiô e lou de la musulmano soun estas tuas. Après las funeraios del paire de la nòvio dissate, un group de musulmans anè à la glèiso dau vilatge e li boutè lou fiò.
Lous manifestants demàndou també la liberaciou d'un capelô coundenna injustomen à la presou.
Talèu après avèdre fa juromen de respecta la coustituciou, dilun, lou niòu Primier ministre Essam Sharaf es ana parla as manifestants, e lour o proumés de tourna basti la glèiso e de baila larjour al capelô.
Lou senhe Sharaf « s’es empenha d’afana la decido del marescau Tantaoui (lou capiòu dau Counselh suprème dei forço armados) de tourna basti la glèiso del vilatge de Soul à son emplaçomen avans Paschos » e de « persegui lous autours de la destrucciou e de l’incèndi de la glèiso », ço-dis amai lou cabinet del Primier ministre soubre sa pagino ouficialo de Facebook.
Segoun l’agéncio al Mena, lous manifestants esìjou també la demissiou del gouvernadour de Helwan, Qadri Abou Hussein.
Boutan à la fi de troçs de liturgìo copto
en copte, gregau e arabe.
Lou papo d'Alessandrìo es Shenouda III.
Coumo toùti li papos d'Egipto èro mounge.
Coumo lou chausiguèrou ?
Li coptes faun coumo acò:
Un sistèmo electourau de tres coulégis: li fizèls, li clèrgues, li mounges elegis tres persounos.
Puèi se tiro al sort per sabér quonho de las tres sarò papo. Perqué ? per leissa lou Sant-Esperit chausi.
Atau lou papo copte es lou resultat de la chausido dis omes e de la chausido de Dieu.
Lou mounge qu'avio agut lou mai de vote èro pas Shenouda; èro lou manhifique Matta el Meskin, "Matieu lou paure", mounge del desèrt del Wadi Natroun, que belcop de mounde counsidèrou ja coumo un sant.
Acò retiro pas ris al prestìgi e ei qualitats del grond Shenouda III, que fouguè prouclamat papo , patriarcho d'Alessandrìo e successour de sant Marc en 1971.
Shenouda III, lou papo de la Glèisio Copto
Shenouda III èro dien lou sègle (= abans de se rendre mounge) Nazir Gayed Rafaèl. Es nascut dien lou vilatge d'Abnoub en 1923. Faguè d'estùdis d'Istòrio abans de se rendre mounge, puèi l'ourdounèrou prèire en 1955.
Abnoub es dien la regiou de la vilo que se souno Assiòout en copte, e Assiout en arabe (amm' un T emfatique en arabe).
Un troucet de liturgìo douminicalo copto:
Aquéssi troçs de liturgìo copto praticado cado dimenche à Châtenay-Malabry nous endicou lei lengos praticados:
Duoi lìnios de copte e quatre de gregau pel "Kyrie eléisson",
la benedicciou en arabe pes vivents e pei morts, que dis:
Que lour santos benediccious sàiou soubre nàutri, amin,
Glòrio à tu, senhour,
Senhour, glòrio à tu,
Senhour ajo pietat, senhour ajo pietat.
Senhour, benezis-nous.
Acòrda-lour lou repaus. Amin.
/fdata%2F4189852%2Favatar-blog-1203636952-tmpphp67xRFi.jpeg){kind=avatar}